الرحيل إلى الله

كانت الساعة تدق الثالثة و الربع بتوقيت المدينة المحلي ، و بهو المؤسسة التي أعمل بها يغص بالموظفين ، عجقة داخلين و طالعين ، و الكل يديم النظر على ساعته ، شعور بالضيق يطغى علينا ، لا لم يمت أحد ، و لسنا ننتظر مكافأة ، كل ما في الأمر أنه حل وقت الانصراف ، و ما زال محسوبكم أبو جندل يتحفظ على دفاتر التوقيع في سجنه الاحترازي .

صار الموظفون خواريف … قلت لصديقي فقال : الفرق أنو هي بتنعد و بيمشي الحال و بتروح عالمسلخ  أما نحن لازم نوقع حتى على ذبحنا ، و بينما كنا نحكي أطلت الدفاتر و أطل أبو جندل خلفها متباهياً ببدلته الرمادية مختالاً على طريقة النوفو ريش ، يتمختر باتجاه باب الخروج ، و الله مو ناقصو غير يشلح هالطقم  و يبدلها ببدلة لون كاكي ، و يحط على كتفو كم نجمة و يحمل كرباج ، و نصّف نحنا بالدور متل العساكر لنضربلو التحية ، و بعدها نشلح بالشورت على أكواع و ركب و نعمل كم فتلة جري بالساحة ، حتى يحس أنو قدم شي مهم ل هالوطن ، و يرضو عنو اللي فوق ، و يعلقلولو على صدروا كم وسام ، مشان بكرا إذا حدا فكر ياكلو يحط بحسابو أنو بدو يضل بالمرحاض أربع خمسة أيام و هو يستفرغ أوسمة .

أحلى شي وقت اللي بيحكيك عن القانون ، على اعتبار كل شغلو قانوني و نظامي ، ” عم أحكيكم نظامي ” ، و خصوصاً لما أجبرنا أنو نكتب تعهد على عدم تقديم طلب نقل أبداً ، و انتبهوا لي على أبداً ، إي رئيس حكومتنا العتيد على جلالة قدرو ما عملها ، و الله فيه يقنعوا حتى طلعنا تعميم مجلس الوزراء القاضي على خمس سنين فقط … من يومها و حكايتنا معو حكاية !

قال لا تخاف من أبن النعمة إن افتقر ، و لكن خاف من ابن الفقر إذا اغتنى و صار و ما كانت تكفيه  لقمة الخبز النظيفة ، مش راح تكفيه  الملايين إذا اغتنى ، مش راح يشبعوا  غير كف تراب .

الثلاثي شين ( شوفير … شرطي … شرمــ … )

مصطلح غريب تسمعونه للمرة الأولى على ما أظن ، تبدأ حروفه بالشين و ينضح جوهره بالشر ، يمسك بتفاصيل الحياة السفلية في البلد ، و يتضامن أفراده في حلف مقدس لا يظهر للعيان منه سوى واجهات عداوة أوهموا الناس بها !

الأول شوفير تكسي عالخط ، عداد سيارتوا مافي مفك براغي و عزقات ما دخل فيه ، و على ما في فراطة ، و ما اشتغل العداد ، و خليها عالله ، و الشرطي ابن الحرام فقعني مخالفة ، غير صوت الراديو اللي بيبخش طبلات الأذن ، و التحقيق اللي بيبلش أول ما تحط إجرك بالسيارة بتكون بكامل عقلك بتصفي مأجر الطابق العلوي ، و ما إلك غير تقول الحمد لله أنو وصلت عالبيت بدال الجبانة !

(أكمل القراءة…)

عفواً ، و أين نجد مسؤولين ، أكيد هؤلاء انقرضوا ، و بالتالي الأمر كله إشاعة لأنه لم  يبق  منهم إلا مستحاثات الأفضل أن توضع  في متحف الفن الطبيعي ، فكما تكونوا يولى عليكم ، شعب كله مسؤولون من أين نأتيهم  بالشعب ، و في بلدي المسؤولون مثل المياه العكرة ، لا تضيفها على شيء إلا و تفسده ، لأن أغلبها مياه آسنة ، أعتذر مية مجاري .

ولهذا عمرو المصدر ما كان مسؤول ، و إلا لكان له اسم و هوية و تاريخ ميلاد ، و نحن هنا لن نخالف القاعدة القائلة صرح مصدر مسؤول رفض ذكر اسمه